#rbu_បូមទៅបឺតទៅ​ (បំផុសដោយ NASA)

#rbu_បូមទៅបឺតទៅ (បំផុសគំនិតដោយអត្ថបទរបស់ NASA)

បូមទៅបឺតទៅ ទាន់នៅមាន

បន្តិចអត់ឃ្លាន ខានបានស៊ី

ណាសាផ្សាយថា គង់ដល់ទី

ហិនធនធានពី លើផែនដី។

ប៉ុន្មានទសវត្ស៍ ខាងមុខទៀត

ផែនដីបៀនបៀត ដោយទុក្ខថ្មី

ព្រោះតែមនុស្ស ពុំប្រណី 

ប្រើធនផែនដី ហួសហេតុពេក។

បំផ្លាញធនធាន ព្រះធរណី

នៅគ្រប់ទិសទី គួរសង្វេគ

លើដីក្នុងទឹក អាកាសមេឃ

ចិត្តត្រអាលត្រេក សែនលោភលន់។

ព្រៃភ្នំពាយឈើ ស្ទើរគ្មានសល់

មាត់សមុទ្រវ៉ល់ សំណល់ជន់

ហៀរហូររហាច ប្រសាចពន់

ឃើញព្យុះជំនន់ ចិត្តឈឺចាប់។

ប្រើពុំប្រណី ផែនដីខ្សោះ

ស្ទើររលាយអស់ ដូចឃើញស្រាប់

បំផ្លាញខ្លួនឯង ហិនហោចឆាប់

ដូចចាំតែស្លាប់ មុនមរណា។

www.theguardian.com/environment/earth-insight/2014/mar/14/nasa-civilisation-irreversible-collapse-study-scientists